Ҫулӑм чӗлхи вӑрӑммине пурте пӗлеҫҫӗ. Ӗнер, раштав уйӑхӗн 2-мӗш каҫхине, Ҫӗрпӳ районӗнче пӑрусем чутах шар курман.
Вут-ҫулӑм Елашри йывӑҫ витере алхасма пуҫлани ҫинчен пушарпа кӗрешекенсене 18 сехет те 30 минутра систернӗ. 40 пӑрӑва витерен кӑларнӑ. Йывӑҫ вите вара ҫунса кӗлленнӗ.
Раҫҫейӗн Инкеклӗ ӗҫсен министерствин Чӑваш Енри тӗп управленийӗнче пӗлтернӗ тӑрӑх, пушар сӳнтерме 4 единица техникӑпа усӑ курнӑ. Вут-ҫулӑм мӗн сӑлтавпа алхасма пуҫланине ҫӑлавҫӑсем палӑртӗҫ.
Раҫҫейӗн Инкеклӗ ӗҫсен министерствин Чӑваш Енри тӗп управленийӗнче кӑҫал пирӗн республикӑра 1473 пушар тухнине пӗлтереҫҫӗ. Вут-ҫулӑма пула 69 миллион ытла тенкӗлӗх шар курнӑ. 64 ҫн пурнӑҫе татӑлнӑ, 91-шӗ суранланнӑ. 143 ҫынна ҫӑлма май килнӗ.
Паян, раштав уйӑхӗн 1-мӗшӗнче, ирхи 9 сехетре Ҫӗрпӳ районӗнчи Вӑрманкас Кӗҫтемӗр ялӗнче хӗрарӑм виллине тупнӑ. Вӑл мӗншӗн вилнине палӑртман-ха. Малтанлӑха пӗлтернӗ тӑрӑх, хӗрарӑм шӑннипе пурнӑҫран уйрӑлнӑ.
Следовательсем ял ҫыннисенчен ыйтса пӗлнӗ. Чылайӑшӗ каланӑ тӑрӑх, хӗрарӑм шӑнса вилме пултарнӑ. Вӑл 69 ҫулта пулнӑ. Следстви комитечӗ пӗлтернӗ тӑрӑх, хӗрарӑма пусмӑрласа вӗлернӗ йӗр ҫук.
Халӗ кун тӗлӗшпе тӗрӗслев пырать. Следовательсем ҫакна уҫӑмлатӗҫ: хӗрарӑм шӑнса вилме пултарнӑ е ҫук.
Ҫӗнӗ ҫул ҫитиччен вӑхӑт нумаях юлмарӗ. Чылайӑшӗ уява хатӗрленме тытӑннӑ ӗнтӗ. Ҫӗрпӳ районӗнчи Чиричкассинчи культура ҫуртӗнче Хӗл Мучин ӑсталӑх лаҫҫисем уҫӑлнӑ.
Палӑртмалла: асӑннӑ тӑрӑхра Хӗл Мучин ӑсталӑх лаҫҫисем виҫҫӗмӗш ҫул ӗҫлеҫҫӗ. Унта хутшӑнакансен шучӗ те ҫулра-ҫул ӳссе пырать. Ӑсталӑх лаҫҫине ҫӳрекенсем алӑ айӗнчи япаласенчен хитре япаласем ӑсталаҫҫӗ. Ав нумаях пулмасть вӗсем хутран юр пӗрчисем касса кӑларнӑ, пӗр-пӗрне тӗлӗнтернӗ.
Ӑсталӑх лаҫҫинче хатӗрленӗ япаласене вӗсем тӑванӗсемпе тусӗсене парнелеҫҫӗ, хӑйсем те усӑ кураҫҫӗ.
Ҫӗрпӳ районӗнчи Сӑнав поселокӗнче пурӑнакан Дмитрий Яковлев Мускава вӗренме кайнӑ, пӗр уйӑхран ҫухалнӑ. 22 ҫулти каччӑ 5 кун ҫыхӑнӑва тухмасть. Ӑна пӑшӑрханса ӳкнӗ тӑванӗсем шыраҫҫӗ.
Аппӑшӗ каланӑ тӑрӑх, каччӑ унпа Мускавра пӗр уйӑх пурӑннӑ. Вӑл унта вӗренет, сесси тытма килнӗ. Каччӑ чӳкӗн 11-мӗшӗнче ирхи 10 сехетре килтен тухнӑ та ҫухалнӑ. Тепӗр талӑкран тӑванӗсем ӑна шырава панӑ. Вӑл Питӗрте пулма пултарать-мӗн.
Дима унччен кун пек ҫухалман. Халӗ унӑн ҫемйи Мускавра, ӑна шырать. Сирӗн Дима пирки хыпар пур тӑк ҫак номерпе шӑнкӑравлӑр: 8 917 662 30 93.
Чӑваш Енре чи хӑтлӑ вырӑнсене палӑртнӑ. Конкурс кӑҫалхи ҫу уйӑхӗнчен пуҫласа чӳк уйӑхӗччен тӑсӑлнӑ.
Чи хӑтлӑ территорсенчен пӗрремӗш вырӑна Йӗпреҫри пӗтӗмӗшле пӗлӳ паракан шкул-интернат тухнӑ, иккӗмӗшне – Етӗрне хулинчи «Росинка» ача пахчи; виҫҫӗмӗшне – Шӑмӑршӑри «Аленушка» ача пахчисем.
Чечек тата кану вырӑнӗсем йӗркелессипе Елчӗкри Иванов урамӗнчи тӗп лапам чи хитри тесе хакланӑ, иккӗмӗшӗнче — Йӗпреҫ районӗнчи Хурамалти кану вырӑнӗ, виҫҫӗмӗшӗнче – Ҫӗрпӳ районӗнчи культура тата вулавӑш центрӗ.
Урамсенчен Комсомольски районӗнчи Чӗчкен ялӗнчи Бауман урамӗ — пӗрремӗш вырӑнта, Улатӑр районӗнчи Кивӗ Эйпеҫри Шкул урамӗ — иккӗмӗшӗнче, Патӑрьел районӗнчи Пӑлапуҫ Нурӑсри Пахча урамӗ – виҫҫӗмӗшӗнче.
Нумай хваттерлӗ ҫуртсенчен пӗрремӗшӗнче — Куславккари Герцен урамӗнчи 10-мӗш ҫурт, иккӗмӗшӗнче – Йӗпреҫ районӗнчи Шӑрттанти Кӑтӑр урамӗнчи 40-мӗш ҫурт, виҫҫӗмӗшӗнче – Ҫӗмӗрлери Урицкий урамӗнчи 6-мӗш ҫуртӑн 1-мӗш корпусӗ.
Уйрӑм ҫуртсенчен пӗрремӗш вырӑнта — Етӗрнери Калинин урамӗнче пурӑнакан В.Г.Курочкин хуҫалӑхӗ, иккӗмӗшӗнче – Куславкка районӗнчи Энтрияльӗнчи В.
Ҫӗрпӳ районӗнчи Депутатсен пухӑвӗн депутачӗ Сергей Беккер «Правда ПФО» тӗнче тетелӗнчи хаҫата пӗр ватӑшӑн пӑшӑрханать.
Сӗнтӗрвӑрри районӗнче пурӑнакан Антонина Родионова ҫурчӗ хӑй вӑхӑтӗнче пушарта шар курнӑ. 2012 ҫулта ӑна вӑхӑтлӑх тесе Сӗнтӗрвӑрри хулинчи Лазо урамӗнчи 82-мӗш ҫуртра пӳлӗм панӑ. Фронтовик хӗрӗн пурӑнмашкӑн урӑх кӗтес ҫук.
Депутатран хӗрарӑм 2016 ҫулхи авӑн уйӑхӗнчех пулӑшу ыйтнӑ. Ун хыҫҫӑн Сергей Беккер район прокурорӗ Владимир Соловьёв ячӗпе ыйту ҫырнӑ. Надзор органӗнчен кинемей пӳлӗмӗ хӑтлӑ, унта ҫутӑ, сивӗ шыв пур, пӳрте хутса тӑраҫҫӗ тесе хуравланӑ.
Анчах пенсионер пӳлӗмре пурӑнма май ҫуккине паян та ӗнентерет иккен. Антонина Николаевна каланӑ тӑрӑх, чӳречесемпе алӑксене хаҫат чикет.
Район прокуратуринче хӗрарӑма район администрацийӗнче хваттер черетне тӑма сӗннӗ. Хӗрарӑм вара хӗл мӗнле каҫмаллинчен шикленет.
Ҫӗрпӳ районӗнчи Тӗнсӗр ялӗнчи пӗвере пулӑсем вилни пирки унччен пӗлтернӗччӗ. Следовательсем ку ӗҫ-пуҫа уҫӑмлатаҫҫӗ. Следстви версийӗ тӑрӑх, пӗвере пулӑсем вилнӗшӗн «Ҫӗрпӳ беконӗ» сысна комплексӗ айӑплӑ. Дикректорӑн ҫумне – тӗп инженерне айӑпласшӑн.
Аса илтерер: ку ӗҫ кӑҫал ҫу уйӑхӗнче пулнӑ. Сысна комлексӗ ял ҫумӗнчи ял хуҫалӑх ҫӗрӗсем ҫине 14 пин тонна тислӗк тӑкнӑ. Тӗп инженер ҫакна тивӗҫлипе тӗрӗслесе тӑман. Ҫумӑр ҫунӑран тислӗкӗн пӗр пайӗ пӗвене лекнӗ, ҫавна май унта аммиак шайӗ нумай хутчен ӳснӗ. Куншӑн пулӑсем вилнӗ. Тӑкак 23 пин тенкӗпе танлашнӑ.
Ҫӗнӗ Шупашкарта пурӑнакан нумай ачаллӑ ҫемьесене тӳлевсӗр ҫӗр лаптӑкӗ уйӑрса панӑ. Ӑҫта? Ҫук, хула ҫывӑхӗнче мар, Йӗпреҫ районӗнчи Ҫӗпрел ялӗнче.
Ольга Чепрасова алӑ пуснӑ постановленире палӑртнӑ тӑрӑх, асӑннӑ ялта пӗтӗмпе 10-11 соткӑллӑ 50 лаптӑк уйӑрнӑ. Палӑртмалла: ку таранччен Спутник хулари нумай ачаллӑ ҫемьесем валли 253 ҫӗр лаптӑкӗ панӑ. Вӗсем Ҫӗнӗ Шупашкарта, Сӗнтӗрвӑрри районӗнче тата Ҫӗрпӳ районӗнчи Ҫамрӑксен поселокӗнче вырнаҫнӑ.
Ҫӗпрел ялӗ Ҫӗнӗ Шупашкартан ҫывӑхах мар: 120 ҫухрӑма 1 сехет те 40 минут каймалла. Автобуспа Шупашкарти автовокзалтан каяс тӑк 350 тенкӗ тӳлемелле.
Монополипе кӗрешекен федераци службин Чӑваш Енри управленийӗ регионти ҫӳп-ҫап илсе тухакан «МВК «Экоцентр» тата «Траст-Вега» тулли мар яваплӑ общество тӗлӗшпе ӗҫ пуҫарнӑ. Вӗсем конкуренцие хӳтӗлесси пирки калакан саккуна пӑснӑ-мӗн.
Ҫӗртме уйӑхӗн вӗҫӗнче регионти оператор «Трас-Вега» фирмӑпа килӗшӳ алӑ пуснӑ. Унта палӑртнӑ тӑрӑх, иккӗмӗшӗн Шупашкарти Калинин тата Ленин районӗсенче, Ҫӗнӗ Лапсар поселокӗнче, Ҫӗнӗ Шупашкарта, Шупашкар, Красноармейски, Ҫӗрпӳ, Етӗрне, Сӗнтӗрвӑрри районӗсенче ҫӳп-ҫап илсе тухмалла. «ГрандСити» тулли мар яваплӑ общество тата Филиппов харпӑр усламҫӑ монополипе кӗрешекен службӑна кун пирки ҫӑхавланӑ – аукциона ӗҫӗн пысӑк калӑпӑшне шута хурса йӗркеленӗ, ҫавна май пӗчӗк услам субъекчӗсем унта хутшӑнайман имӗш. Вӗсем палӑртнӑ тӑрӑх, аукциона ҫӳп-ҫап илсе тухмалли рынока монополизацилес тӗллевпе йӗркеленӗ.
Ҫӗрпӳре пурӑнакан Алексей Кузнецов пӗвесене пулӑсем ярать. Вӑл пӗчӗк пулӑсене хӑйӗн укҫипе туянать те ялсенчи пӗвене ӗрчеме ярать.
Арҫын каланӑ тӑрӑх, Чӑваш Енре пулӑ тытмалли пӗвесем сахаллансах пыраҫҫӗ. «Пулӑ ҫукпа пӗрех», - тет вӑл. Ку вара ҫынсене ытлах пӑшӑхантармасть, ҫавӑнпа Алексей Кузнецов ҫак ӗҫе хӑй пуҫӑннӑ.
«Вӗтӗ пулла хамӑн укҫапа туянатӑп. Хӑш-пӗр пайне, карасе, пулӑ хуҫалӑхӗнче тӳлевсӗрех параҫҫӗ. Карпа, ытти хаклӑ пулла укҫан туянатпӑр. Ыттисем те ҫак пуҫарӑва малалла тӑснӑ пулсан аван пулӗччӗ», - ҫапла каласа кӑтартнӑ арҫын «Про Город» хаҫата.
Алексей Кузнецов каланӑ тӑрӑх, халӗ Ҫӗрпӳ районӗнчи пӗвесене 50 килограмм лайӑх пулӑ янӑ.
+7.3 °C